बैंक तथा वित्तीय संस्था परिसंघ नेपाल (सिबिफिन)का अध्यक्ष प्रचण्ड बहादुर श्रेष्ठ नेतृत्वको प्रतिनिधिमण्डलले राष्ट्रिय योजना आयोगका नवनियुक्त माननीय उपाध्यक्ष डा. गुणाकर भट्टसमक्ष यही वैशाख ४ गते शुक्रबार सिंहदरबारमा भेटघाट गरी हार्दिक बधाई तथा सफल कार्यकालको शुभकामना व्यक्त गरेको छ । बधाई भेटमा सिबिफिन प्रतिनिधि मण्डलले उपाध्यक्ष डा. भट्टसँग समसामयिक आर्थिक परिवेश र समग्र बैंकिङ क्षेत्रको विषयमा सघन छलफलसमेत गरेको छ ।
भेटमा सिबिफिन अध्यक्ष श्रेष्ठले सिबिफिनले गर्दै आएका कामहरुबारे जानकारी गराउँदै राष्ट्रिय अर्थतन्त्रको विकासमा सबैको हातेमालो जरुरी रहेको बताउनुभयो । बैंक तथा वित्तीय संस्थामा जम्मा भएको रकमलाई राष्ट्र विकासमा लगाउन र समग्र विकासमा बैंकिङ क्षेत्रमा रहेको पूँजी प्रयोग गर्न सकिने मत उहाँको थियो ।
सिबिफिनका वरिष्ठ उपाध्यक्ष तथा प्रवक्ता राजेश उपाध्यायले तरलता व्यवस्थापनमा नयाँ विकल्पहरु खोज्नुपर्ने तथा बैंकहरुले कमाउने बाटोहरु सीमित भएकाले विकल्पहरु खुला राख्नुपर्ने धारणा राख्दै अध्ययन, अनुसन्धान तथा नीतिगत रुपमा सिबिफिन र आयोगको सहकार्यमा जोड दिनुभयो ।
सिबिफिन कोषाध्यक्ष रमण नेपालले सरकारी कोष तथा बैंक तथा वित्तीय क्षेत्रको सहकार्यमा सम्पत्ति व्यवस्थापन कम्पनी छिटो ल्याउनुपर्नेमा जोड दिँदै राष्ट्र बैंकको नीतिमा एकरुपता हुनुपर्ने धारणा राख्नुभयो । यस्तै, सहकोषाध्यक्ष दिलिप मुनंकर्मीले राष्ट्र बैंक र सरकारको नीतिका कारण बैंकहरुको ऋण दिने क्षमतामा कर्मी आएको भन्दै प्राथमिक पुँजी कोषको दबाब घटाएर एनपिएमा अन्तर्राष्ट्रिय मापदण्डको प्रोभिजनमा जानुपर्ने बताउनुभयो ।
सिबिफिनका महानिर्देशक रोशन कोइरालाले बैंक तथा वित्तीय संस्थाको सेयर प्रतिफल न्यून रहेको, संस्थापक र साधारण सेयरबीच समूहगत विभेद रहेको जानकारी गारउँदै बाफियामा प्रस्तावित बैंकर र व्यवसायी छुट्याउनका लागि विकल्पहरु दिनुपर्ने मत राख्नुभयो ।
सिबिफिनका सरोकार सुनेपछि नवनियुक्त उपाध्यक्ष डा. भट्टले सिबिफिनले उठाएका विषयको सम्बोधनसहित अर्थतन्त्रको डेडलक खुलाउन आफू गम्भीर भएर लागेको बताउनुभयो । सरकारी नीतिमा बजेटमार्फत र मौद्रिक नीतिमार्फत आवश्यक सम्बोधन हुने बताउँदै उहाँले सम्पत्ति व्यवस्थापन कम्पनी समयसीमासहित आउनुपर्ने धारणा राख्नुभयो । लगानीकर्तालाई प्रोत्साहन गर्दै सरकारले बैंकिङमा थुप्रिएको पैसा ऋण लिएर विकासमा खर्च गर्ने उहाँले विश्वास दिलाउनुभयो ।